Гэр бүл залуу хосуудын харилцааг бага багаар сүйтгэж байдаг 10 зүйл.

 

Гэр бүл залуу хосуудын харилцааг бага багаар сүйтгэж байдаг 10 зүйл. 😬

Гэр бүл салалтыг зөвхөн араар тавилттай холбох, эр эм аль нэг хүйсийх нь буруу болгож харах бодлоо хогийн саванд хийх цаг нь болжээ. Учир нь араар тавилт бол хосуудын харилцаа нэгэнт сүйтгэгдсэн хойно бий болдог олон үр дүнгүүдийн ердөө ганц нь л юм.

Нэгэнт гэр бүл болоод бие биенээ хайрлана гэж ам өчиг өгөөд сууцгаасан хүмүүс хэдийн үр хүүхэдтэй болчихоод нэг л өдөр "Ер нь бүтэхгүй юм байна" гээд салчихдаг. Тэгвэл тэрхүү шалтгаан нь засч болох жижигхээн зүйлсээс улбаалаад томордог гэвэл итгэх үү?

1. Хань ижлээ байж л байдаг нэг хүн гэж үздэг. Эхнэр нь нөхрөө хүндэлдэггүй, нөхөр нь эхнэрээ хайхардаггүй хандлага нэг л мэдэхэд харилцааг хөргөдөг. Анх ямар байсан яг тэр халуун дотно уур амьсгалаа бие биедээ мэдрүүлж байх нь чухал. Зүгээр л нэг танил, байдаг л нэг хүн мэтээр харилцах нь та хоёрын харилцааны түвшний утга учрыг алдуулдаг. Энд заавал эрэгтэй нь эсвэл эмэгтэй нь түрүүлж харилцаагаа сэргээх ёстой гэсэн юм байхгүй. Хэн хэн нь бие биедээ хүлээлт үүсгэлгүй түрүүлж сэтгэл гарга. Түрүүлсэн нь доошоо орчихгүй шүү дээ.

2. Сөрөг сэтгэл хөдлөлөө хянаж мэддэггүй. Гэр бүл болно гэдэг нэг хүн шиг болохоос нэг их ялгаагүй. Гэтэл эхнэр нь юм уу нөхөр нь сөрөг бодол давамгайлсан, тэрхүү сөрөг сэтгэл хөдлөлөө гэртээ гаргадаг бол аз жаргалтай харилцааны тухай бодоод хэрэггүй. Энэ үед хамтрагч нь өөрөө тухайн сөрөг сэтгэл хөдлөлөөс нь ангид байх хэрэгтэй. Өөрөөр хэлбэл давхцаад уурлаад байж болохгүй, өөрийгөө тайван байлгах. Харин дараагаар нь хэвийн үед нь хань ижилтэйгээ сайн ярилцаж бүүр болохгүй мэргэжлийн хүнд хандах хэрэгтэй. Таны хийж чадах зүйл дууссан юм шиг санагдвал та зүгээр л орхиорой. Харин таны орон зай руу халдаж эхэлбэл та хил хязгаараа заавал тавьж өгөх ёстой шүү. Хэрэв та өөрөө сэтгэл хөдлөлд автамтгай бол тухайн сөрөг сэтгэл хөдлөлөө ядаж гэрээсээ өөр эзгүй газар гаргаж сур. Эс бөгөөс сөрөг хортой харилцаа нь салалт дээрээ тулах нь цаг хугацааны асуудал. Гэр бүл бол таны хайрлаж, хайрлагдаж, аз жаргалтай байх ёстой нандин орон зай болохоос сөрөг муу муухай бүхнээ хаядаг газар биш.

3. Хань ижлийнхээ хэрэгцээ, сонирхлыг үл тоомсорлох. Дэлхий дээрх бүх амжилттай харилцаа нь харилцан буулт хийх, хамтран ажиллах мэдрэмж дээр суурилдаг. Иймд зөвхөн өөрийн хэрэгцээ шаардлагаа урдаа тавьсаар байвал гэр бүлийн харилцаа амжилттай байж чадахгүй. Зөвхөн миний юм, би гэсэн хандлагатай бол та ганцаараа л амьдрах хэрэгтэй. Ханийнхаа хэрэгцээ шаардлагыг авч өгөх, биелүүлэх боломжгүй байж болно л доо. Гол нь боломжтой үедээ өөрийн хэрэгцээ шаардлага мэт сэтгэл гаргаж бас хүндэтгэж өөрийн хүсэл сонирхолтойгоо адил түвшинд авч үзэх ёстой.

4. Хэт хийсвэр төсөөлөл. Гэр бүл болоод л цаанаасаа л аз жаргал ундраад, өглөө нь халуун кофе бэлдэж, өндөг шарсан секси залуу инээмсэглэж угтаад, шөнө нь дарс тулгаж ромачиклаад л лаг лаг газраад аялаад л, хөтлөлцөж мэргэжлийн зураг авхуулаад эсвэл хамаг л юмыг чинь бэлдэж өгөөд шөнөжингөө чамайг жаргаах халуухан эмэгтэй г.мэт. Ер нь хүний төсөөлөл барагдахгүй л дээ. Дээд дурдсан зүйл байж болно, байхгүй ч байж болно. Гэхдээ дээр дурдсан зүйл бол амьдралын өчүүхэн харагдах хэсэг нь шүү дээ. Залуу хүмүүс үзсэн кино, харсан зүйлээрээ хэт хийсвэр төсөөлөл, сайхан мөрөөдөлд автаж явсаар гэр болоод хатуу ханатай тулдаг. Хар бараан талыг нь сая нэг олж хардаг. Гэвч ямар ч харилцаа тэр дундаа гэр бүлийн харилцаа амар байдаггүй. Маш олон асуудал гардаг. Тэс хоёр өөр хүн нэг гэрт ороход маргах нь тодорхой. Амьдралын төлөөх төрөл бүрийн хүнд хэцүү шийдвэр, асуудлууд байсаар л байна. Өөрөөс чинь ч шалтгаалахгүй. Зөвхөн жаргах гэж гэр бүл болдоггүй гэдгийг л санах хэрэгтэй. Жаргал зовлонг хамтдаа туулах гэж л гэр бүл болдог. Эцсийн эцэст ганц бие байх нь ч таны сонголт шүү дээ. Заавал хүнтэй сууж өөрийн болон хэн нэгний сэтгэл санаагаар тоглох шаардлагагүй.

5. Өс санамтгай, гомдол тээсэн байдал. Гомдол тээсэн харилцаа ерөөсөө эрүүл байхгүй. Эцэст нь салах дээрээ хүртэл тулдаг. Түр зуурын гомдол бол угаасаа сэтгэлийн хариу үйлдэл буюу байх зүйл. Харин удаан хугацааны гомдлыг тээх эсэхээ хүн өөрөө л шийддэг. Хань ижил чинь яаж ч гомдоосон байж болно. Гэхдээ уучлах гэж, ойлгох гэж, байгаагаар нь хайрлах гэр бүл болсон гэдгээ санаарай. Зүгээр үерхэж байгаа хүүхдүүд бол хамаа алга. Алддаггүй хүн байдаг бол гаргаад ир. Тэр цагтаа харин гомдлыг үхэн үхтлээ тээж болох л юм. Ер нь уучилна гэдэг та өөрийнхөө аз жаргалын төлөө л хийж байгаа зүйл шүү дээ. Амьдрал бол сарнайн ор биш гэдгийг санахад илүүдэхгүй.

6. Хүлцэл өчиж мэддэггүй байх. Хүмүүс бид танихгүй хүний хөл дээр гишгичихээд л уучлалт гуйдаг. Гэтэл хамт амьдарч байгаа хүнийхээ өмнө хүлцэл өчиж, буулт хийж, уучлаарай гэдэг үгийг чин сэтгэлээсээ хэлэхдээ үнэхээр харам. Бардам байдлын тэмцээнд ороод байгаа ч юм шиг. Үнэхээр л таны буруу бол эсвэл хань ижлээ хүнд хэцүү байдалд санаатай санамсаргүй оруулчихсан бол хүлцэл өчиж яагаад болохгүй гэж? Эерэг харилцааны насыг чинь уртсгадаг үйлдэл бол хүлцэл өчих юм шүү.

7. Зөв зохистой шаардлага хүлээж авдаггүй. Аан энэ ингэж л байдаг юм гэсэн хандлага. Ер нь дээр дурдсан уучлал гуйдаггүй, бас шаардлага хүлээж авдаггүй г.мэт хандлага нь БИ үзэл давамгайлсныг илтгэнэ л дээ. "Намайг байгаагаар минь хайрлах ёстой" гээд гэдийгээд суугаад байж болох ч хань ижил чинь гэр бүлийнхээ ирээдүйн төлөө, хамтын эрх ашигийн төлөө шаардлага тавьж байвал та үүргээ ухамсарлах хэрэгтэй. Хамгийн тод жишээ нь таныг эрүүл мэнддээ анхаарахыг гэр бүлийн хүн чинь шаардах эрхтэй. "Би өөрөө мэдэж байна" гэж томрохоос өмнө таны эрүүл мэнд дордвол өвдөөд өгвөл хэн таныг асарч хэн зовох вэ гэдгийг бодоорой. Тэр үед чинь ямартай ч "Чи өөрөө мэднэ гэсэн шүү" гээд өвдөж байг гээд хаях хатуу сэтгэлтэй хань гэж лав байхгүй дээ.

8. Нэгнийхээ орон зайг хүндэлдэггүй. Гэр бүл боллоо гээд нэгнийгээ эд тавилга шиг өмчилж байгаа хэлбэр бишээ. Цугтаа амьдралын төлөө зүтгэх үүрэг хүлээхийн сацуу, нэгнийхээ төлөө гэсэн сэтгэлтэй байх хариуцлага үүрч байгаа. Нэгнээ гэсэн сэтгэл нэгнийхээ эрх чөлөөг хаах биш харин ч өгөх ёстой. Зөвхөн эрх чөлөөнөөс гадна тухайн хүний үнэлж хүндэлдэг зүйлс, ар гэр, шүтдэг бурхан юу байдаг юм хүндэтгэлийн бүсийг нь үгүйсгэж, доромжилж хэрхэвч болохгүй. Танд таалагдахгүй байсан ч байгаагаар нь л хүлээн зөвшөөрөх хэрэгтэй. Хүнийг хайрлана гэж байгаа бол энэ ухамсар зайлшгүй байх ёстой юм шүү.

9. Тэс хоёр өөр зорилго мөрөөдөлтэй байх. Мэдээж хувь хүнийхээ хувьд зорилго мөрөөдөл өөр байж болно. Жишээ нь нэг нь хэвлийн өөхөө хасах гэж байхад нөгөөх нь гарын булчингаа томруулах. Энэ бол ерөөс харшилдах зорилго биш. Харин гэр бүлийн хэмжээнд та хоёрын огтлолцдог чухал зүйлс дээр зорилго зөрөлдөөд байвал л гол асуудал яригдана. Эхнэр нь гадаадад амьдарна гээд ирээдүйгээ төлөвлөдөг, нөхөр нь хөдөө гарч ийм байшин барьж амьдарна гээд ирээдүйгээ төлөвлөдөг. Эцэст нь хэнийх нь хүслээр явах вэ? Уламжлалаа барьвал эр хүнээ дагаж амьдрах ёстой гэнэ. Гэхдээ энд эр эмээр ялгахыг хүсэхгүй байна. Хэнийх нь шийдвэр хамгийн бага эрсдэл, сул талтай бас хамгийн их давуу талтай байна, хэн нь илүү ухаалгаар бодитоор харж байна. Түүнийгээ л дага. Мэдээж энэ шийдвэрлэх яриан дээрээ хэн хэн нь бууж өгөхөд бэлэн байдлаар хандах нь чухал.

10. Бие биедээ цаг гаргадаггүй. Нэг нэгнийгээ тэвэрч, хэрэгтэй үед нь хамтдаа байх гэдэг гэр бүлийн зайлшгүй хэрэгцээ шаардлага мөн. Бас үүрэг. Гэр бүл бол яахав болдогоо болчихсон харилцаа гээд ажил, найз, танил, хобби юу байдаг юм бүх зүйлээ урдуур нь тавьчихдаг. Угтаа эсэргээрээ байх ёстой шүү. Таныг унаж босоход аль алинд нь ямар ч нөхцөл болзолгүйгээр дэргэд чинь байх нандин орон зай бол гэр бүл.

Мэргэжлийн сэтгэл зүйч таныг хүлээж байна: 🤙 86092012